Regering se impak studie word betreur

TLU SA betreur die swak kwaliteit van die regering se impakstudie oor onteiening sonder vergoeding wat vandeesweek deur Sakeliga bekend gemaak is. Dit is ‘n sprekende voorbeeld van die gebrekkige kundigheid in staatsdepartemente om belangrike inligting saam te stel en weer te gee.
Die dokument wat in opdrag van die Departement van Openbare Werke saamgestel is, vorm die basis waarop die regering die koste en voordele van die Onteieningswet baseer. Sakeliga het die dokument deur ‘n toegang-tot-inligting-aansoek bekom.
“Ons probleem met die sogenaamde impakstudie is tweeledig,” sê mnr. Henry Geldenhuys, die president van TLU SA. “Eerstens is die kwaliteit van die dokument onaanvaarbaar swak. Dit lyk plek-plek of die samesteller eenvoudig net ‘n generiese antwoord geplak het wat nie eers relevant is nie. Tweedens verwys die studie na die goedkeuring wat sommige organisasies aan die wet sou gee en beslis onwaar is.
“Hoe kan die regering ‘n belangrike wet wat so ‘n groot impak gaan hê op die ekonomie probeer aanpas, gegrond op hierdie dokument?”
TLU SA bedank Sakeliga vir die bekendmaking van die impakstudie-dokument.
In die dokument word net een landbouorganisasie – Agri SA – se insette weergegee en dit wys dat hulle die voorstelle (met voorwaardes) met omsigtigheid aanvaar. Agri SA het pas weer beklemtoon dat hulle gekant is teen onteiening teen ‘n nulvergoeding en indirekte onteiening.
“Selfs al was dit waar, is die lugtige insette van slegs een landbouorganisasie beslis nie verteenwoordigend van alle rolspelers in die landbou waardeketting nie, en TLU SA sal dit nooit so aanvaar nie,” sê mnr. Geldenhuys. “Die regering wys hiermee net weer dat die toekoms van die land geen gewig dra in besluite nie. Dit gaan hier oor die deurvoer van ‘n ideologie waar net sekere mense (kaders) bevoordeel word en die res in ellende moet voort sukkel.”