Opvolg Ope brief aan ATKV

Mev Deidré le Hanie

Uitvoerende Hoof: ATKV

Geagte Deidré,

‘n Paar dae gelede het jy, namens die ATKV, ‘n verklaring uitgereik, waarin jy vertel het hóé sensitief die ATKV glo nou is, of geword het, vir respek vir die ander man, en dat sulke respek glo nie beter bewys kon word nie as om sy taal te gebruik — glo presies wat julle “Afrikaans-Plus”-projek wou doen.

Ek het toe in ‘n ope brief aan jou gevra wat die ATKV, in die lig van hierdie respek-sensitiwiteit van julle, gaan doen, om sake-ondernemings en staatsinstellings so ver te kry om ook respek vir AFRIKAANS te toon deur dit te gebruik. Wat gaan julle doen, wou ek van jou weet, om hierdie organisasies se afforsering van Engels op my, teë te werk?

Soos ek verwag het, het jy my toe nie geantwoord nie. Tot nou toe nog nie. Maar jy het darem wel, volgens Netwerk24, ‘n verklaring uitgereik, skynbaar om die vure wat jy aangesteek het, te probeer doodslaan. Daarin gebruik jy omslagtige woorde, woorde, woorde, maar jy systap my vrae baie behendig.

Tot met die Groot Ontboeseming, die Bek-verbyprater: die ATKV, sê jy, wil “deur kleurgrense heen breek” en julle wil ”mure afbreek”.

Nè?

Baie dankie, daarmee het jy alles, én méér,  gesê as wat jy dalk wou of bedoel het om te sê ….

Soos ek nou die dag vir jou gesê het: nou wéét ons waar ons met die ATKV staan ….

Geen verdere vrae, soos hulle in die hof sou sê ….

J F Wiesner