ATKV word TKV

Word die Afrikaanse Taal- en Kultuurvereniging (ATKV) nou net ʼn Taal en Kultuurvereniging (TKV) is die reaksie van dr. Pieter Mulder van VF Plus op die aankondigings van die nuwe uitvoerende hoof van die organisasie, me. Deidre le Hanie.

Sy het aangekondig dat die ATKV ʼn wyer gemeenskap as net die Afrikaanse gemeenskap wil bereik deur ook ander tale in te sluit. “Daar is niks mee verkeerd om na ander taalgroepe in Suid-Afrika uit te reik nie, maar dit kan die hoofbesigheid van die ATKV verander. Vir 87 jaar was die ATKV ʼn kultuurtuiste vir Afrikaans,” sê dr. Mulder.

Vir baie jare het die regering en die staat die Afrikaanse taal en kultuurlewe beskerm en ondersteun. Daarom was dit nie nodig dat Afrikaanse burgerlike organisasies onnodig tyd en geld aan hierdie funksies afstaan nie. Sedert 1994 is dit nie meer die geval nie. Lede van die Afrikaanse gemeenskap het op ʼn vrywillige basis organisasies geldelik en andersins ondersteun om hierdie vakuum vir hulle te vul.

Dr. Mulder wys daarop dat daar tans deurlopende regeringsdruk op Afrikaans is. “Afrikaanse kultuur- en burgerlike organisasies ervaar ook ʼn berekende finansiële afskaling deur die regering van alles wat met Afrikaans verbind word. Die Departement van Kuns- en Kultuur se begroting en projekte wys hoe daar na alle ander groepe uitgereik word maar hoe die Afrikaanse taalgemeenskap afgeskeep word. Die Afrikaanse taalgemeenskap sal daarom armer wees om die ATKV, of enige soortgelyke organisasie in hierdie tyd te verloor.

“Die geskiedenis het bewys dat as ʼn organisasie probeer om alles vir almal te wees, dit dikwels in die middel deurval en eindig deur niks vir niemand te wees nie. As ʼn ATKV-lid vir dekades sal ek, saam met duisende ander Afrikaanse ATKV-lede, die praktiese uitvoering van die beoogde projekte dophou voor ʼn finale gevolgtrekking oor die ‘nuwe’ ATKV en die nuwe uitvoerende hoof gemaak sal kan word,” sê dr. Mulder.

(Lees ook die ope brief van J Wiesner wat Die Vryburger gister reeds onder Briewe geplaas het. Red)