Staatsbelange by steenkoolmyne lei tot vergrype

Die ANC-bestel se belange in steenkoolmyne lei tot water- en grondvergrype in die Oos-Transvaal en die betrokkenheid van die tersaaklike departemente moet ontbloot word.

Hierdie uitspraak deur die direkteur van groundWork, Bobby Peek, volg na die bekendstelling van vyf omgewingsorganisasies se verslag, “Zero Hour”, oor mynboubedrywighede in die Oos-Transvaal.

Die verslag is deur die Sentrum vir Omgewingsreg (CER) uitgereik en is die resultaat van vyf jaar se navorsing deur die onderskeie omgewingsorganisasies.

Mynbou in die waterryke provinsie het vanaf 2005 tot 2010 met 300% uitgebrei, en op meer as 60% van die grondgebied is daar aansoeke vir mynbou of prospektering.

Dit is veral oopgroefmynbou wat groot verwoesting in die provinsie saai.

In die navorsing het dit geblyk die twee departemente reik water- en mynboulisensies vir steenkoolmyne uit sonder om die gevolge te bereken wat dit vir die waterbronne, biodiversiteit, menslike gesondheid, luggehalte en voedselsekerheid kan meebring.

Die CER is nie net bekommerd oor die mynbou in die Oos-Transvaal se negatiewe invloed op die waterbronne nie, maar ook op die uitwerking daarvan op die landbousektor aangesien voedselsekerheid in gedrang is. Chroniese gesondheidsprobleme by inwoners is nog ‘n bron van kommer.

Die betrokke organisasies het ‘n beroep op die minister van omgewingsake, Edna Molewa, gedoen om in te gryp en die oorblywende waterryke gebiede in Oos-Transvaal ingevolge wetgewing te laat bewaar.

Foto – ‘n Oopgroefmyn in Oos-Transvaal