Ten einde laaste nog hulp vir Koerde in Kobani

Gewapende magte van Irakse Koerdistan het vir die eerste keer begin om aan te sluit by die gevegte teen die Islamitiese Staat (IS), ook bekend as Isis of Isil, se beleëring van die Siriese stad, Kobani, naby aan die Turkse grens.

Die sogenaamde Peshmerga-vegters se aankoms word al meer as ‘n week verwag nadat Turkye kort gelede bekend gemaak het dat hy tóg sy grense vir versterkings sal oopstel.

Sowat 150 Peshmerga (letterlike betekenis: hulle wat die dood konfronteer) is verwag om deel te neem aan die gevegte wat al langer as ‘n maand duur, ondanks voortdurende lugaanvalle deur die militêre koalisie onder leiding van Amerika.

Die Turkse regering is  klaarblyklik verantwoordelik vir die oponthoud van meer as ‘n week weens die Turke se onderliggende antagonisme jeens die Koerde se volksnasionalistiese aspirasies. Die Peshmerga vorm ‘n integrale deel van hierdie politieke doelwitte van die Koerde.

Of die Pershmerga-vegters die skaal in Kobani sal kan swaai, is ‘n ope vraag. Die militêre koalisie onder leiding van Amerika het al meer as ‘n honderd lugaanvalle op hierdie stad in ‘n Koerdiese landelike enklawe uitgevoer en lugaflewerings van wapens en ammunisie aan die Koerde in die stad gedoen. IS-vegters, wat al sowat die helfte van Kobani beheer, het onlangs beweer dat van hierdie wapens in hulle hande geval het.

Indien die verskillende Koerdiese faksies hulle geskille sou kon bylê en as ‘n verenigde front uit hierdie stryd tree, kan dit groot moeilikheid vir Turkye inhou weens sy openlike vertragingstaktieke en bereidwilligheid om die Koerde op die altaar te plaas.