Plaasterroris tot 104 jaar gevonnis

‘n Mosambiekse plaasterroris is in die streekshof op Nelspruit tot 104 jaar agter tralies gevonnis vir die skrikbewind wat hy in 2007 in die Malalane en Baberton-omgewing gevoer het.

Lorenzo Mazunze (33 jaar) is skuldig bevind aan diefstal, betreding, huisbraak met die doel om te roof, gewapende roof, poging tot moorde en saakbeskadiging.

Landdros Andre Geldenhuys het gesê Mazunze is in 2008 aangekeer toe hy geskiet is terwyl hy ‘n gesin op ‘n plaas op Malelane probeer beroof het.

Die terroris het nie alleen opgetree nie en alle getuienis toon dat hy die een was wat elke keer ‘n vuurwapen uitgehaal en geskiet het.  Volgens Geldenhuys is Mazunze gelukkig ‘n baie swak skut.

In een van die gevalle is ‘n plaasboer van Malalane, Andre van Rooyen, met ‘n byl in sy huis aangeval, waarna Mazunze hom in die maag geskiet het. Mazunze het tydens ‘n gewapende roof  op ‘n plaasboer se vrou, Gloria Morgan, op Baberton geskiet, maar het mis geskiet. Hy het op twee plase die plaaswerkers se lone geroof en sodoende R23 000 en R200 000 in die hande gekry.

Hy het telkens na ‘n plaasaanval na Mosambiek teruggekeer en nog aanvalle beplan.

Die plaasterroris is 104 jaar gevangenisstraf opgelê en sal nooit vir parool kwalifiseer nie.