Botswana gekant teen Khama-dinastie

‘n Grondwetlike geskil het in Botswana uitgebreek oor bewerings dat president Ian Khama probeer om ‘n dinastie te vestig deur sy broer as adjunk-president te benoem.

Die geskil het ontstaan toe Khama daarop aangedring het dat parlementariërs vir ‘n adjunk-president moet stem deur hande op te steek, eerder as deur middel van geheime stemming.

Dit het vrese in sy eie party, die Botswana Demokratiese Party (BDP), laat ontstaan dat hy beoog om sy jonger broer, Tshekedi Khama, as sy adjunk te benoem en enige teenstand wil onderdruk.

Tshekedi Khama is ‘n parlementslid vir die Serowe Noordwes-kiesafdeling, wat eens deur sy broer verteenwoordig is.

‘n Dringende aansoek is intussen in die hooggeregshof gedoen om die grondwetlikheid van ‘n geheime parlementêre stemming te bevraagteken. Die saak sal op 6 November voor die hof dien en ondertussen sal die pos van adjunk-president nie gevul word nie.

Die pas afgelope verkiesing was die eerste een waarin die BDP, wat onafgebroke sedert onafhanklikheid van Brittanje in 1966 regeer, minder as 50% van die stemme gekry het. Die verwagting was dat die BDP se meerderheid van 79% in 2009 sal daal weens ‘n groeiende gevoel van ontevredenheid onder die jonger geslag en die stedelike middelklas wat meen ‘n politieke verandering is noodsaaklik aangesien die BDP bykans al vyf dekades aan bewind is.

Foto – Ian Khama