Zuma sorg vir nefie

Gerugte is in omloop dat pres. Jacob Zuma glo sy broerskind gehelp het om finansiering vir sy sukkelende mynmaatskappy te bekom.

Zuma het glo ‘n Amerikaanse belegger by sy ampswoning in Pretoria onthaal en toe het die man $2 miljoen (sowat R13 miljoen) aan Khulubuse Zuma se omstrede Aurora Empowerment Systems kort daarna betaal.

Volgens die gerugte is die geld in ’n verdagte rekening gedeponeer maar intussen het dit verdwyn. ’n Klag is by die polisie ingedien.

Chris Brown, ’n direkteur van die New Yorkse beleggingsfirma Global Emerging Markets (GEM), het gesê hy het op 11 Julie 2010, die dag van die eindstryd van die Wêreldbeker-sokkertoernooi, persoonlik met Zuma in sy huis in Pretoria vergader.

Tydens dié vergadering sou Zuma na bewering vir Brown “talle kere bedank het” vir GEM se hulp om Aurora uit sy finansiële verknorsing te help. Aurora was in daardie tyd in die nuus omdat die groep desperaat op soek was na geld om te keer dat sy Pamodzi-goudmyne gelikwideer word.

Ten spyte van die feit dat die maatskappy groot finansiële probleme ondervind het, was Aurora ook in die proses om op die Johannesburgse Effektebeurs (JSE) genoteer te word en wou dit bereik deur die oudrugbybaas Brian van Rooyen se genoteerde maatskappy Labat Africa te koop.

Waarnemers het gewonder wat van die JSE se reël geword het dat ‘n maatskappy vir vyf jaar lank ‘n goeie wins moes toon voordat dit aansoek kon doen om genoteer te word.

Volges gerugte sou GEM 20 miljoen aandele in Labat Afrika verkry as sekuriteit vir die $2 miljoen. Op 17 Augustus 2010 is die geld na ’n ENB-rekening in Lenasia oorgeplaas. Volgens inligting is die rekening geopen in die naam van Thulani Ngubane, een van Khulubuse Zuma se sakevennote.

Van Rooyen het na bewering aan Brown gevra hoe hy $2 miljoen kon uitgee sonder enige bevestiging van die Labat-aandele.

Volgens betroubare inligting is ’n saak by die polisie ingedien om uit te vind wat met die $2 miljoen gebeur het.