Hy kon nie staan en toekyk hoe boewe sy vriend se bakkie steel nie, en het besluit om op te tree, maar dit het nie sonder drama verloop nie.

Pierre Fouche. ’n boukontrakteur van Kuilsrivier in die Wes-Kaap, moes noodgedwonge aan sy vriend se bakkie vasklou toe die dief daarmee begin wegry.

Pierre het bly vashou aan die bakkie, wetend dat die dief wat teen 100 km per uur ry, iewers moet stop, maar dat hy nie durf los teen die hoë spoed nie, want dit kan sy dood beteken.

Vir meer as ’n half-kilometer moes hy hou vir al wat hy kan, met skoene wat deur geskuur is op die teer, tot daar waar die dief moes stop by ’n vierrigting stopstraat, daar het hy gelos om hard met die teer kennis te maak.

Op daardie oomblik het ’n metro polisiebeampte die spulletjie gesien en vinnig nader gekom om te verneem wat gaande is.

Kort daarna is die bakkie gevind, waar die dief dit gelaat het. Selfs die eienaar se beursie is onaangeraak in die bakkie gevind, maar die dief was skoonveld.

Pierre sê hy kon nie toelaat dat sy vriend Koos se bakkie gesteel word nie, want dit is al voertuig wat hy het, en daar is nie eers versekering op die ryding nie.

Fouché moes later in die hospitaal opgeneem word vir behandeling van sy voete wat erg seergekry het met die gesleep op die teerblad.

“Ek en vriend Koos ken mekaar baie jare, en ons help maar mekaar waar ons kan,” het Pierre gesê.