Opposisieleier onder huisarres

In Rusland het die hof die land se opposisieleier, Alexei Navalny, onder huisarres geplaas en hom ook verbied om die internet te gebruik. Hy mag ook onder geen omstandighede besoekers ontvang nie.

Alexei Navalny is een van Rusland se vooraanstaande politieke figure en ’n verbete vegter om korrupsie uit te roei.

Navalny is saam met ’n aantal ondersteuners verdoem toe hulle vroeër vanjaar ’n lywige verslag gepubliseer het op hulle webblad waarin korrupsie uitgewys word wat ter voorbereiding van die Olimpiese Winterspele in Sotsji plaasgevind het.

Navalny se ondersteuners het op sy blog bekend gemaak dat hy aangekla is van bedrog en daarop skuldig bevind is en onder huisarres geplaas is.

Gedurende 2013 is hy aan bedrog skuldig bevind en sou vyf jaar gevangenisstraf moes uitdien, maar is vrygelaat toe grootskaalse betogings in Moskou begin is.

Navalny is reeds verskeie kere as ’n rassis uitgekryt, maar derduisende Russe skaar hulle agter die man.

Foto – Alexei Navalny