Kleuter kry nagmerries na straf

‘n Saak van kindermishandeling is deur ‘n vierjarige kleuter se ouers by die Garsfontein-polisiekantoor aanhangig gemaak na sy onderwyseres hom in ‘n stikdonker stoorkamer toegesluit het omdat hy nie in die klas wou luister nie.

Francois van Niekerk se ma, Felicia, sê haar kind is so erg getraumatiseer dat hy deesdae nie meer alleen wil slaap nie.

Felicia van Niekerk van Die Wilgers in Pretoria-Oos het begin onraad vermoed toe Francois vreeslike nagmerries begin kry en geweier het om alleen te slaap. Sy het hom uitgevra en toe het hy haar die storie van die toesluit in die stoor vertel.

Van Niekerk is saam met haar seun na sy klaskamer, waar hy die deur uitgewys het waaragter hy toegemaak is. Volgens haar is die vertrek vol stoele en tafels met ’n piepklein venster en meen dat met die lig af moes dit pikdonker gewees het. 

Die onderwyseres het glo gesê sy het die kind vir twee minute in die stoor toegemaak omdat hy nie wou stilsit nie. Sy het glo erken dat dit nie reg was nie en om verskoning gevra.

Die hoof van die kleuterskool, Sandra Smith het gesê die onderwyseres is ’n betroubare, ervare personeellid en dat die gebeurtenis ’n geïsoleerde geval is wat uit verband geruk is.