Minister beoog misdaad-vrye land

Nathi Mthethwa, die Minister van Polisie het gesê hy is positief dat Suid-Afrika ’n misdaad-vrye land kan word, soos wat sy mikpunt is.

Hy het die uitlating gemaak tydens die geleentheid waar nasionale misdaadstatistieke bekend gemaak is.

Hy sê dat dit nog ’n ruk gaan neem voor die mikpunt bereik sal word, en beweer hy dat die statistieke daarop dui dat misdaad aan die afneem is.

In sy verslag word aangetoon dat daar bykans 200,000 polisiebeamptes is wat beteken daar is een polisiebeampte vir elke 350 mense in die land.

Tydens die boekjaar 2011-12 was 307,580 mense skuldig bevind en in 2012-13 het dit toegeneem tot 352,513.

Intussen is kenners bekommerd oor die gewelddadigheid in die land, waar gemiddeld 45 moorde per dag gepleeg word, en ’duisende ernstige misdade daagliks die samelewing ontwrig met verkragtings, rooftogte en kapings.