Lekker ou Jan

Lekker ou Jan

Ou Oom Jan van Riebeeck het darem nou weer ‘n lelike ding oorgekom toe hy sommer die skuld gekry het vir Pretoria se naam. Sien, volgens Apson Magaung het die uiters ongepoetse Oom Jan in drie duikbote by Durban aangeland, ‘n vliegtuig geneem tot in die Transvaal en, sonder om te vra op wie se grond die vooruitstrewende moderne stad gevestig was wat hy daar gevind het, sommer die plek Pretoria genoem het voordat hy ‘n trein na die Kaap geneem het waar hy ‘n huis gebou en na sy gunsteling bier vernoem het.

Aapseun Malgang en sy makkers wil nou vir hierdie rede die proses oordoen om die stad se naam weer te laat verander na die naam van die eerste kaptein van die Kaiser Chiefs wat in 1665 die liga gewen het nadat hulle die hele Mamelodi Sundowns span in die finaal met knopkieries die dinkpitte ingeduik het. 

Blykbaar is die vorige publieke deelname proses te deeglik gedoen. Mense het skriftelik die ou naam verkies. Hierdie keer moet blykbaar nou seker gemaak word dat niks op skrif kom nie, want so gaan die publiek se opinie duideliker wees! Dan vra die mense my nog hoekom ek my badwater drink! Sulke dinge sal maak dat mens fietse se saals begin lek!

As Oom Jan moet hoor wat alles aan hom toegeskryf word draai hy in sy graf om! Hy sou nooit eers sy skepe, die Dommerassis, die Goedkoop en die “Raper” seker nooit eers beklouter het as hy geweet het hoeveel moeilikheid hy in die Transvaal sou maak nie. Met die prys van brandstof en die e-tol is dit net nie die twee varke en ses hoenders werd wat dit hom destyds gekos het om Pretoria te besoek nie. Daarom dat hy die N1 gebou het.

Dankie Oom Jan vir Pretoria, die Internet, Ruimtevaart, die binnebrandenjin en al die ander goed wat Oom ontdek en ontwikkel het!

Tot volgende slag

Die Sweep.