FVP bekommerd oor inhegtenisneming sonder afdoende bewyse


Die sekretaris van dié Party het in ’n persverklaring gemeld dat daar klaarblyklik nie voldoende bewyse bestaan om die twee geskorste lede in hegtenis te neem nie.

Die verklaring word hiermee volledig geplaas. Dit staan egter in kontras teen die berigte wat bekend gemaak is oor wapens wat versamel is aangesien mortiere nie bekom kon word nie.

Die verklaring lui soos volg:
Na aanleiding van verskeie bronne, wil dit voorkom, of daar by Hein Boonzaaier geen onwettige wapens, of plofstof gekry is nie, terwyl by Johan Prinsloo moontlik ‘n enkele Baby Browning pistooltjie, wat nie gelisensieerd was nie, gevind is.

Die Federale Vryheidsparty keer ten sterkste dit af, dat mense onwettige wapens besit en indien Johan Prinsloo moontlik skuldig hier aan is, sal hy verantwoording moet doen vir hierdie oortreding, maar die FVP is wel bekommerd oor of dit arrestasie van hierdie mans regverdig. Ons as FVP en die publiek word in die duister gehou oor wat regtig aan die gang is. Dit is duidelik dat tot die media agterdog is oor die inligting rakende die saak. ‘n Saak soos hierdie het ‘n groot invloed op die etikettering van ‘n minderheidsgroep, sowel as die invloed wat dit het op rasverhoudings.

Die FVP se Uitvoerende Partyraad hoop nie die gerugte wat die rondte doen, is waar dat hierdie manne aangehou word, sonder enige bewyse van hierdie “terreurkomplot”, nie. Ons respekteer die ondersoek van die Suid-Afrikaanse Polisie, maar doen weer ‘n beroep daarop dat die Kommissaris van Polisie en die Vervolgingsgesag indringend na die wettigheid van hierdie arrestasie moet kyk en dat hierdie saak spoedig aandag sal geniet.