Beplanning misluk om ANC konferensie te ontwrig

Die polisie het sewe vermeende regsgesinde blankes in hegtenis geneem wat klaarblyklik ’n tent op die ANC se nasionale konferensie, met plofstof wou opblaas.

Die sewe verdagtes, waarvan minstens twee persone lede is van die Federale Vryheidsparty, is in Bloemfontein, Douglas en Naboomspruit aangekeer.

Die provinsiale polisiewoordvoerder, Brigadier Billy Jones, sê die mans is vasgetrek ná inligting ontvang is.

Die mans is blykbaar tussen 40 en 50 jaar oud en sal binnekort in die hof verskyn op aanklag van hoogverraad.

Berig is ontvang dat veiligheidsmaatreëls by die konferensie intussen verskerp is.

Waarnemers het aan Die Vryburger gesê dat dit steeds onverklaarbaar is dat mense hulle met so ’n operasie kan bemoei, wel wetende dat elke geval vooraf na die veiligheidsmagte verklap word. Dit dui daarop dat die moontlikheid nie uitgesluit is dat spioene aangestel word om mense by sulke operasies te betrek nie.

“Deur sulke optrede word die probleme van die regime op die agtergrond geskuif”, word gesê.