Wie van ons ken nie hierdie pragtige blomme nie en hoeveel van ons se bruidsruikers het dit nie gehad nie?

Die kleure wat daar deesdae by kwekerye en tuinsentrums en skoue te sien is, is pragtig. Dis wit, geel, oranje, donker pienk, ligte pienk tot amper swart.

Wanneer ons dit sien weet ons nie watter plant om te koop nie, want die een is regtig mooier as die ander een. Die plante word ook Arum lelies genoem.

Zantedeschia is ’n genus van die kruidagtige blommende plante en familie van die Araceae en is inheems aan Afrika, van Suid-Afrika tot Malawi.

Die naam van die geslag (genus) is ’n huldeblyk aan die plantkundige Italianer Giovanni Zantedeschi wat in die 1700 gelewe het.

Zantedeschia spesies is kruidagtige meerjarige plante en groei baie goed in die meeste gebiede, veral die wit varkore wat nogal van klammigheid hou en kan matige ryp verdra.

Dit is ’n geharde plant en sommer sterk en blom baie gereeld, veral die wit varkore. Varkore vorm ’n bos met regop stingels waaraan die blom op die bo-punt gevorm word. Die plante word 1 – 2,5 meter hoog met lang swaardvormige heldergroen blare wat tot 45cm lank word  Daar is ook verskeie soorte met wit gespikkelde blare.

Die blomskede is tregtervormig met ’n geel stuifmeel stingel in die middel. Wanneer die blomme doodgaan aan die stingels, vorm daar ‘n risoom met sade aan wat geel verkleur sodra hul ryp is. Dit lyk nogal na geelmieliepitte aan ‘n stronkie.  Hierdie saad kan geplant word deur  dit los te maak van die risoom en net ‘n gaatjie in die grond met die vinger te druk, en elke pit afsonderlik in te druk en toe te maak met grond.

Dit neem tussen 14 na 21 dae om te ontkiem. In massas onder die skadubome vertoon hulle regtig pragtig. Die stuifmeel lok bye en skoenlappers na ons tuine, asook suikerbekkies. Onthou om slakgif  tussen die plante te strooi.  Onthou ook dat ystervark se kind baie lief is vir hierdie plant en sy wortels.

Van die spesies is giftig want daar is kalsium oksalaat teenwoordig. Die hele plant is giftig en veroorsaak ’n geïrriteerde vel of ’n brandende sensasie in die mond en kan naarheid en diarree veroorsaak indien dit ingeneem word.

Daar is egter volke (in Natal) wat die blare van die varkore pluk, dit kook en eet.

Tuiniers, plant sommer baie varkore, hulle groei maklik en blom ook maklik. Onthou ook dat Oktobermaand ’n heerlike tuinmaand is. Besoek u rooskwekery of tuinsentrum en gaan ontdek die nuwe “honey-dijon” roos, wat heuning/mosterd kleurig is.

Volgens rooskenners gaan hierdie roos baie gewild word en is ook ’n baie goeie blommende roos en pragtig

Geniet u tuin en ook die heerlike reën wat oral uitgesak het.