IMPALA LELIE (ADENIUM MULTIFLORUM)

Hierdie lelie word aangetref in die droë streke van ons land soos die verre Noord Transvaal. Dit is nogal gehard en ’n vetplantagtige struik of boom. Hy word tussen ’n half-meter en 3 meter hoog.
Die lelie groei baie stadig en lyk soos ’n miniatuur kremetartboom met ’n blink gryserige opgeswelde stam met lang takke. Dit moet in goed gedreineerde grond in vol-son geplant word. Hy is tevrede met min water in die somer en geen water in die winter nie.
In ander lande word hy ook die “Desert Rose” genoem.

Hy verloor sy blink grys-groen blare voordat hy blom en die blomme is welriekend, wit tot ligte pienk met ’n donker pienk randjie om die blaartjies. Die blomme is nie giftig nie. Dit hou baie lank aan die plant en na die blomtyd verskyn die peulagtige sade. Hy kan met steggies geplant word of ook met die saad, wat dadelik geplant moet word want die saad bly nie lank vrugbaar nie.
Die plant is toksies en kan vel irritasies veroorsaak.